Karrantzako etxebizitza batean aerotermia eta zonifikazioaren kontrola

/in /by

Etxe honetan instalazio fotovoltaiko bat zegoen aurretik eta gasoliozko galdara baten bitartez berotzen zen lehen. Bezeroak eguzki-moduluen aprobetxamendua handitu eta kontsumo fosila ezabatzeko aerotermia-ekipo bat instalatu nahi zuen, era berean etxeko berokuntza zonifikatu eta logelak klimatizatzeko.

Aipatutako beharrak asetzeko tenperatura altuan lan egin dezakeen 14 kW-ko bero ponpa bat instalatu da 240 L-ko interakumuladore batekin, Ur Bero Sanitarioa ere hornitzeko. Honez gain, etxeko eremu desberdinen berokuntza/hozketa modu independentean kontrolatzeko zonifikazio-sistema bat jarri da eta logeletan fancoilak kokatu dira.

Mallabiko baserri batean banaketa hidrauliko berria

/in /by

Baserri honetan gasolio-galdarak berotutako uraren banaketa gaizki diseinatuta zegoen eta ur beroaren zirkuituan dutxak erradiadiore bat gehiago bezala konektatuta zeuden, hau da, dutxan ur beroa izateko etxeko erradiadore guztiak berotzen ziren lehenengo.

Hau konpontzeko, hoditeria hidraulikoaren banaketa berritu da kontrol-sistema egokitu bat instalatuta, orain ur beroa modu egokian banatzen da etxean zehar.

Ibarrangeluko udaletxean aerotermia instalazioa

/in /by

Ibarrangelun Energia eta Klima Plan Integratua garatu zen aurreko urtean. Dokumentu honetan zehaztutako lehentasun handiko ekintzetako batek Udaletxeko galdara elektrikoak kendu eta bertan aerotermia instalazio bat egitea proposatzen zuen, galdara elektrikoek errendimendu oso eskasa baitzuten.

Aurten gauzatu dugu aldaketa hau, honetarako 14 kW-ko bi bero-ponpa instalatu dira, bat udaletxeko berokuntzarako eta bestea mediku kontsultarako. Hauek tenperatura altuan funtzionatzen dute, oraindik ez baitira barneko erradiadoreak aldatuko.

Ekintza hau garatu ostean, udaletxeko inguratzaile termikoa hobetu nahi da leihoak, fatxada eta teilatua isolatuz. Behin hau eginda, teilatuan instalazio fotovoltaikoa garatzea planteatzen ari da Udala.

Muxikan 4,4 kW-ko instalazio fotovoltaikoa

/in /by

Muxikako txabola batean 8 eguzki-modulu instalatu dira inbertsore hibrido batera konektatuta. Honela, 4,4 kW-ko potentzia duen instalazio fotovoltaikoa garatu da, etorkizunean bateriak konektatzea ahalbidetuko duena egindako konfigurazioa aldatu gabe.

Etxebarriako baserri batean 2,75 kW-ko instalazio fotovoltaikoa

/in /by

Etxebarrian 550 W-ko 5 moduluz osatutako instalazio fotovoltaiko berria egin da etxe bateko sarreraren teilatuan. Hauek dira egindako instalazioaren ezaugarriak:

  • Aurretik tarifa finkoa ordaintzen zen argindarragatik etxean eta zegoen kontsumorako prezioa altua zen.
  • Kontsumoa murrizteko 2,75 kW-ko potentzia instalatu da eguzki-moduluetan.
  • Fakturazio elektrikoa murrizteko kontratu elektrikoa aldatu da komerzializatzaile desberdinen eskaintzak aztertuta.
  • 5 kW-ko inbertsore hibridoa instalatu da, etorkizunean bateriak instalatu eta sarearekiko menpekotasuna murriztea ahalbidetu dezakeena. Gainera, honek eguzki-modulu gehiago instalatzea ere eskaintzen du, baserriko teilatuan lekua baitago.

Ibarrangeluko etxebizitza batean biomasa eta aerotermia bidezko berokuntza, instalazio fotovoltaikoa eta fluxu bikoitzeko aireztapena

/in /by

Etxebizitza baten berritze-obrak aprobetxatuz energia-sistema berriztagarriak instalatu dira eraginkortasun handiko eta emisio baxuko kontsumoa duen beste etxebizitza bat osatzeko.

Ondorengo lanak egin dira bertan:

  1. ERAGINKORTASUNA – Fluxu bikoitzeko aireztapen-sistema: etxean berritzen den aire berriaren tenperatura egokitzeko.
  2. BEROKUNTZA BERRIZTAGARRIA – Aerotermia instalazioa: 16 kW-ko aire-ura bero-ponpa 500 L-ko inertzia depositura eta 300 L-ko interakumuladorera konektatuta. Berokuntza tenperatura baxuko erradiadoreen bidez emango da.
  3. BEROKUNTZA BERRIZTAGARRIA – Biomasa-estufen instalazioa: egurrezko su-baxu eta estufaren instalazioak, 11 eta 14 kW-ko potentziakoak, hurrenez hurren.
  4. INSTALAZIO FOTOVOLTAIKOA – Eguzki-plaken instalazioa: 6,3 kW-ko eguzki-instalazio fotovoltaikoa aerotermia kontsumoaren igoera elektrikoa ase eta etxeko argindar kontsumoaren zati bat hornitzeko.

Etxebizitzaren obrako isolamendu-lanak ere kontuan hartu behar dira eraginkortasunaren hobekuntzan. Behin obra amaituta, etxebizitzaren ziurtagiri energetikoa (CEE) F hizkitik A hizkira igotzea lortu da.

Markina-Xemeingo etxebizitza bateko isolamenduaren hobekuntza eta instalazio fotovoltaikoa

/in /by

Auzo bateko etxebizitza batean obra integrala egin da, eraikinaren energia-eraginkortasuna hobetzeko leiho berriak kokatu dira, teilatua aldatu da isolamendua gehituz eta bertan instalazio fotovoltaiko berria jarri da.

Ondorengoa da egin diren lanen laburpena eta lortutako emaitzak:

  • Aurretik etxea pellet galdara baten bitartez berotzen zen baina bero-galera nabarmenak zeuden teilatuaren eta leihoen egoera zela ta.
  • Leiho zaharrak kendu eta hauen ordez beira bikoitzeko leiho eraginkorragoak kokatu dira bero-galerak murrizteko.
  • Paretak barnetik isolatzeko tratamendua aplikatu da etxeko eremu kritikoetan kontsumo termikoa murrizteko
  • Teilatuaren birgaitzea isolatutako teilatu berria jarriz, hau ere bero-galerak murrizteko.
  • 2,7 kW-ko instalazio fotovoltaikoa teilatu berrian kontsumo elektrikoaren zati bat hornitu eta fakturazio energetikoa murrizteko.

Etxebizitzaren ziurtagiri energetiko berriak (CEE) A hizkia lortu du, hau da, hizki gorena. Honek esan nahi du etxe eraginkorra dela eta bere energia-kontsumoak isuri gutxi sortzen dituela.